BOHOL -Aduna nay persons of interest ang kapolisan sa Panglao Police Station sa Bohol, sa pagpusil patay sa usa ka Danish national sa Barangay Danao, lungsod sa Panglao.
Ang biktima gi-ila nga si Kristian Laurssen, kasamtangan nga nagpuyo sa naasoy nga dapit ug nanag-iya ug beach resort sa isla.
Matod ni Police Major Andie Corpus, hepe sa Panglao Police Station, nakaangkon og samad pinusilan sa ulo ang biktima nga daling gidala sa Governor Celestino Gallares Hospital sa dakbayan sa Tagbilaran apan gideklarar nga dead on arrival.
Sa pagkakaron, nagpadayon ang imbestigasyon sa kapulisan apan aduna na silay gitan-aw nga motibo ug anggulo nga dili lang una nila ibutyag sa publiko.
Gipadayag ni Corpus, nga aduna na silay mga person of interest nga gitan-aw ug gitakdang ipatawag sa mga imbestigador.
Base sa ilang pakisusi giingong adunay record sa barangay ang langyaw nga adunay nakalalis.//