LEGAZPI CITY – Dai man talaga kaibahan an Albay sa listahan kan PAGASA sa mga tatamaan kan El Niño segun sa Albay Public Safety and Emergency Management Office (APSEMO).
Alagad nin huli ta global an phenomenon na ini, igwa man giraray ining epekto sa dry days kun sain mas magrabe an mamamatean na ini.
Segun ini kay APSEMO Chief Dr. Cedric Daep sa intrevista kan Brigada News FM Legazpi, kun sain sinabi pa niya na may drought, dry spell man o wara, igwa iyan ki danyos orog na kun bako timing an pagtanom kan mga paraoma, kun sain pag-abot kan Marso, dapat nakaani na nganing wara nang problemahun pa sa bulan nin Abril asin magtanom liwat pag-abot kan Mayo.
Mientrastanto, sinabi ni Daep, dakol siyang naresibeng mga rekomendasyon katakod kan mga reported damages sa agrikultura, alagad ‘too late’ na huli ta kadaklan duman dapat ginibo na puon kan nag-warning manungod sa drought kan nakalihis na taon.
Kun amay kuta nang ginibo an mga rekomendasyon na ito, posible kutang naibetaran an mga danyos.