Giabisuhan karon sa Securities and Exchange Commission-Davao Extension Office (SEC-DEO) ang publiko batok sa kumpanyang JC Pro Global Trading nga wala kini legal nga papeles aron makapangaylap og investments.
Ang abiso sa SEC-extension office gihimo nunot sa advisory nga gipagawas niadtong June 24 human nasuta nga ang maong kumpanya nga gipadagan sa usa ka Jameskie Earl Cornelio nga naila usab nga Jaypee Halili nagahanyag og investment sa ilang mga kliyente pinaagi sa ‘compensation plan (complan)’.
Subay sa nakaylap nga report sa komisyon, dunay sistema ang JC Pro Global Trading nga mao matud pa ang moatiman sa tanan gikan sa trading, buying ug selling sa cryptocurrency bugti sa inadlaw nga income ug sulod sa 20 ka adlaw anaa sa 200% ang income.
Sumala pa nga moginansya og 50 pesos ang P500 nga kapital kada account ug pasaligan pa nga dunay madawat nga 50 % direct commission gikan sa marecruit nga new accounts.
Ang kalakaran matud pa sa JC Pro Global Trading gipaagi sa Facebook gamit ang mga makaenganyo nga tanyag aron daghan ang mokagat ug mailad.
Tungod niini susama sa “Ponzi Scheme” ang kalihukan sa maong kumpanya nga sikon sa SEC-Davao dili magdugay sanglit magdepende ang kita sa mga bag-ong investors.
Gibaharan sa Commission ang mga nalambigit niini nga dunay tugbang nga silot base sa SRC, Revised Corporation Code, kung asa anaa sa P5 million o 21ka tuig nga pagkabilanggo ang atubangon subay sa Sections 28 ug 73 sa SRC wala pay labot ang mamahimong penalidad ug buluhisan nga angay bayaran sa Bureau of Internal Revenue (BIR). BNFM-DAVAO
