MISAKA na sa 20 ang patay sa dengue samtang padayon ang pagsaka sa kaso apan wala pa’y gideklarang ‘outbreak’ gumikan kontrolado pa sa LGU ang sitwasyon. Adlaw- adlaw nga pagpanglimpyo sa palibot ug sulod sa panimalay ang gihimo ni Luzviminda, taga Barangay Lagao, GenSan aron masigurong luwas ang mga apo sa sakit sama sa dengue.
Kini dungan sa pagsaka sa death toll gikan sa siyam nakalabay nga tuig tandi karong tuiga nga misaka sa 20. Gikan usab sa 686 dengue cases nakalabay’ng tuig misaka og 408% o 3,488 ang kaso sa sakit nga narekord karong tuiga.
Nag-una ang mga dagkong barangay sa nakatala og daghan kaso sama sa San Isidro nga narekord og 411, gisundan sa Calumpang nga dunay 373 samtang Labangal nakatala og 337 dengue cases. Giangkon ni Dr. Lalaine Calonzo, labaw sa City Health Office (CHO) nga gikabalaka nila ang padayong pagsaka sa kaso sa sakit.
Nakadugang sa pagsaka sa kaso mao ang pagbalay-balay nila sa dengue testing, dungan niini padayon gihimong lakang aron makonhuran ang ihap sa kaso sama sa Oplan Kulob, Oplan humol, gipahinumdom usab niini ang 4S method ug kanunay nga pagpanglimpyo sa palibot. Luyo niini, wala nagdeklara og ‘outbreak’ ang LGU gumikan ‘manageable’ ang mga kaso. I Richel Gubalani