Ginklaro sang Department of Trade and Industry (DTI) Capiz nga wala sila nagapangdakop sa mga retailers nga wala nagasunod sa price ceiling sang bugas kundi naga-monitor lang sila sang presyo sang regular kag well milled rice sa merkado kag nagakuha sang mga listahan sang retailers agud i-validate ang mga pangalan sini.
Ini ang ginpahayag ni Ken Quennie Cuñada, Provincial Director sang DTI-Capiz sang ma-interview sang Brigada News FM Roxas City.
Suno kay Cuñada, luyag lamang ni President kag Agriculture Secretary Ferdinand Marcos, Jr. nga mapanubo ang presyo sang bugas apang wala ini nagamandu sa otorisado nga mga ahensya nga magpangdakop.
Mahibaluan sa Executive Order No. 39 nga ginpaguwa sang presidente, ginmandu ang P41 per kilogram nga price cap para sa regular-milled rice kag P45 per kilogram para naman sa well-milled rice.
Ginpahayag man sang DTI, nga nagapakig-angut na ang mga ini sa Department of Agriculture (DA), mga national agencies kag local chief executives para i-activate ang ila tagsa ka Local Price Coordinating Councils agud epektibo nga mapatuman ang mandated price caps sa bugas.
Gin-athag man nga indi sakop sang price caps ang special kag premium rice.
Base naman kay DTI secretary Alfredo Pascual, nagakoordinar na sila sa Philippine Competition Commission (PCC) agud magpatigayon sang tikang batuk sa mga kartel kag iban pa nga mga entities nga nagamanipula sang presyo.
Ginsiling naman ni Cuñada nga may mga ginadihon nga programa ang gobyerno kun paano maaksyonan ang problema kag kun paano mabuligan ang mga retailers nga apektado sang price ceiling rason nga ginakuha ang listahan kag igahatag sa Department of Social Welfare and Development.
Nagapanawagan man ini sa mga retailers nga magsunod sa mandu sang presidente agud mabuligan man ang mga konsumidor nga apektado sang pagtaas sang presyo sang bugas. | Judy Ann Juare