Patay ang driver sang motorsiklo kag ang pasahero sang trycicle sa nagluntad nga aksidente pasado alas 6:00 sini nga gab-i, Nobyembre 2, sa Hda. Flora, Barangay Hilamonan, siudad sang Kabankalan.
Ang pasahero sang trycicle nga gin deklarar dead on arrival sa ospital ang ginkilala sa kay Ann Krizel Genobio, 20 anyos, dalaga kag residente sang Brgy. Orong sang amo man nga siudad.
Samtang ang driver sang motorsiklo nga gintingwaan pa nga marevive apang ginbawian sang kabuhi ang ginkilala naman sa kay Jury Alvarez, 21 anyos kag residente sang Brgy. Tanawan.
Suno sa kay Police Lieutenant Colonel Mary Rose Pico, hepe sang Kabankalan PNP, nga papuli na kun tane ang suspitsado nga si Alvarez angkas ang iya ugangan nga si Mercy Losalo gikan sa city proper apang ini ang nagovertake sa ginasundan nga salakyan rason nga ini ang nagbunggo sa iya sugata nga trycicle.
Dugang pa sang hepe nga nakita na sang driver sang trycicle nga si Kent Arnel Genobio, nga nagapadulong sa iya linya ang motor rason nga ini ang nag pondo apang tigayon ini siya sa gihapon nga nalab-ot.
Posible nga bangud nag overtake si Alvarez sa kurbada nga bahin sang dalan, rason nga nawad-an ini sang control sa iya ginamaniho nga motorsiklo.
Gin hingagaw man dala sa ospital ang angkas ni Alvarez pati na ang driver sang trycicle nga si Genobio kag ang isa pa niya ka pasahero nga iya man iloy nga si Alma Genobio.
Sila ang padayon sa karon nga ginabulong sa ospital.
Ginahulat paman ang desisyon sang magtimbang nga pamilya kun may yara sang luyag magpasaka sang kaso. Via| Kirby Federez