Patay ro sangka eaeaki matapos raya nga barilon ag eab-on sa anang payag sa Sitio Itik Brgy. Cabugao, Altavas, Aklan.
Ginkilaea ro biktimang si Dolphy Raquin 40yo samtang ro suspek hay si Ged Ryan Tuberiadez Raquin 36yo ag parehung residente it Brgy. Cortez, Balete, Aklan.
Base sa report, umagto ro suspek sa payag it biktima para komprontahon raya kaangot sa ginaalegar nga pag-insulto kana.
Nakaangkon it argumento sa magtimbang nga parte hasta sa nagbuoe ro biktima it homemade 12 gauge shotgun pero naagaw raya it suspek ag binaril ro biktima sa ubos nga parte it tiyan.
Kat natumba ro biktima ag buhi pa hay uman segun raya nga binaril it suspek sa waea nga parte it eawas ag linabo pa sa leog nga nagresulta it insigidang kamatayun it biktima.
Samtang, boluntaryong nagsurender ro suspek sa Balete MPS samtang igapaidaeum ro bangkay it biktima sa post mortem examination.
Presente man nga sa kustodiya it Altavas MPS ro suspek para sa nagakaigu nga disposisyon. / ANN DESLENE SALAZAR