AMAY na pinagiromdoman an gabos na mga miyembro kan PNP sa Bicol na magtiner na non-partisan asin dai makisawsaw sa urulay politika urog na sa paabuton na eleksyon sa masunod na taon.
Segun ki PNP-Bicol Regional Director PBGen. Jonnel Estomo, bilang mga otoridad, pangenot na prayoridad kan liderato kan kapulisan an pag utob sa sinumpaan na trabaho asin siertuhon na magiging matuninong an magiging pagpili kan publiko sa masunod na lider kan nacion.
Soboot cierto man na malinaw sa mga ini an saindang kinatitindugan bilang mga public servants.
Parte man soboot kan preparasyon para sa paparaning eleksyon an pagpapakusog kan mga operasyon kontra kriminalidad urog na an kampanya kontra loose firearms asin criminal gangs/goons na pwediser na maging instrumento sa paglakop kan violencia sa panahon nin kampanya asin mismong sa aldaw kan eleksyon.
Parte man kan kampanya an pag ingganyar sa mga gun owners na may expired licenses na mag-renew kan saindang mga firearms registration.
Siring soboot kan kada miyembro kan komunidad, hagad kan saindang lado an tuninong asin organisadong eleksyon kaya padagos na hinahagad an kooperasyon kan lambang saro tanganing dai matawan nin opurtunidad an mga mga kriminal na maghasok nin violencia asin maibusol an matuninong na eleksyon dawa pa ngani nasa tahaw nin pandemya.