Mapasalamaton ug padayong ni-saludo si Governor Steve Chiongbian Solon sa mga kasundaluhan sa probinsya sa Sarangani tungod ato lang bulan sa Nobyembre nakaukay og mga armas ang AFP sa tago nga lugar sa bukirang bahin sa Malapatan.
Trayntay-uno (31) kabuok high-powered firearms ang nakubkuban, gilangkuban sa M16 rifle, M14 rifle, AK-47, M203 grenade launcher ug .30 caliber machine gun. Joint forces sa 1002nd Brigade Philippine Army sa pagpanguna ni Brigadier General Potenciano Camba kauban si Col. Ted Dumosmog, 73rd IB ug 39th IB ang naka-diskubre sa mga tinagong armas.
Ang maong mga armas ang gi-presenta ngadto kang Major General Ernesto Torres Jr., labaw sa 10th Infantry Division pinaagi sa nahitabo nga press conference ug demilitarization ceremony sulod sa headquarters sa 1002nd Brigade sa may Pulutana, Barangay Malandag, Malungon.
Ginoo ug Gugma ang gibutyag ni Governor Saolon nga gigamit sa LGU Sarangani maong daghan ang nanurender. Kung malambuon hilabi na ang kabukiran ug anaa sa katawhan ang kinaiya sa pag-ampo, wala nay rason matud pa nga anaa pay manaka. Maihap na lang ang naglihukan sa walhong grupo sa Sarangani Province nga ang kasagaran ang gabahis-bahis sa mga kasikbit probinsya sa Davao del Sur, Davao Occidental, South Cotabato ug Sultan Kudarat.