LAING gatusan ka mga miyembro sa KaBrigadahan GenSan ang natunolan og tabang niadtong Sabado asa nakatigom og halos P500,000 gikan sa singko singko nga giamot sa mga miyembro.
Sa programa sa radio ug TV sa KaBrigadahan GenSan sa pagpanguna ni Brigada Elmer V.Catulpos, gipasalamatan ang mga miyembro nga walay puas sa pagtabang sa ilang isig ka miyembro ingon man sa uban pa nga gatabang bisan dili miyembro.
Sa gatusan nga gitabangan, tulo ang gihinabi ni Catulpos ug nagpasalamat sa mga miyembro ug sa mga mitabang ug mismo sa Ama ng Brigada nga nagmugna sa KaBrigadahan GenSan.
Ang tulo nga personal nagpasalamat in behalf sa gatusan ka mga miyembro mao silang, Sarah Mae Arocha, single mom nga ang anak ginakombulsyon kada unom ka bulan.
Lakip nagpasalamat si Shiela Mae Quidato nga ang anak bag-o lang nakagawas sa ospital tungod sa dengue ug pneumonia ug si Gibeah Valderama, 27-anyos nga taga Fatima nga naoperahan October 22 tungod sa ectopic pregnancy ug gitangtang ang iyang fallopian tube.
Lakip sa natabangan ang featured case nga si Nelly Osayan nga nagpabilin pa sa ospital human gitangtang ang tumor sa iyang ulo.