MECQ hay implementa na ciudad de Zamboanga Principiando Mayo 8

Zamboanga City- Finalmente ya approva ya el National Inter-Agency Task Force on Emerging Infectious Diseases (NIATF-EID) con el pedimiento del govierno local para pone con el ciudad bajo na Modified Enhanced Community Quarantine.

“Bien pesao este de mio resuelio, cay sabe yo manada gayod hay sale affectao..”

Este el palabra del Alcalde Beng Climaco durante el virtual presser del Zamboanga Task Force COVID-19 anoche, donde ya anuncia este cay principiando na pecha 8 dia de Sabado formalmente hay principia ya el implementacion del MECQ na ciudad.

Ayer ya conveni el miembros del Local IATF para el formulacion del maga guidelines aserca de este nuevo implementacion del estado de quarantina na ciudad.

Uno del maga cambio na guidelines el curfew hour donde hay principia este alas 9 del noche hasta alas 5 del aga.

Uno na maga rason si porque segun ya approva el NIATF con el pedimiento del govierno local para mas afreta con el quarantine status na ciudad, porcausa del subido caso de COVID-19 que serca 7mil ya el total confirmao caso.

Mientrastanto, ta llama el alcalde Beng Climaco con maga ciudadanos para no man panic o tiene miedo este porcausa hay asegura segun el govierno local que hay esta balanciao el sistema de Salud y sector de economia del ciudad.(Brigada Kit-Kat)