Atensyon sa mga pinalangga sang duta!
Masami ka bala ginasunlog nga putot? Manubo kana gani, ginapakanubo ka pa.
Ayaw na magkabalaka, nakahibalo ka bala nga ang mga putot nga tawo ang may malawig nga kabuhi ikumpara sa mga tawo nga matag-as?
Suno sa siyensya, mas malawig ang kabuhi sang mga babaye ikumpara sa lalaki kag madamo naman nga mga pagtuon ang nakapamatuod sini.
Apang, naguwa sa bag-o nga pagtuon nga ang mga palangga sang duta ukon mga putot makabig gid nga maswerte bangud mas malawig gali ang ila kabuhi kaysa mga matag-as.
Sandig sa duha ka longevity experts nga sanday Jean Marie Robine, isa ka expert demographer nga pila na ka dekada nga nagatuon sa relasyon sang ikaayong lawas kag kalawigon sang kabuhi kag si David Sinclair, co-director sang Center for Biology of Aging Research sa Harvard Medical School.
Ila ginpahayag nga mas putot ang mga tawo sang-una bangud kulang ang mga ini sa nutrisyon, rason kun ngaman madasig sila ginatapikan sang balatian, kag manubo ang life expectancy.
Samtang nagadugay, madamo na sang nadiskubrehan ang mga tawo, nagaguwa nga kutob may ikasarang ang ordinaryo nga tawo nga mag angkon sang basic needs, mas malawig ang kabuhi sang mga putot ikumpara sa mga matag-as.
Base sa datos, sang minilyon nga mga nagkalamatay, mas malip-ot ang kabuhi sang mga mataas nga tawo bangud mas madamo sang diet-related chronic diseases ang mga ini.
Sa isa ka pagtuon naman sa pungsod Finland, sa 2,500 ka mga ginsurvey nga ginlakipan sang skiers kag basketball players, nagaguwa nga mas malawig sang pito ka tuig ang average nga edad sang skiers kaysa mga basketbolista.
Gani kun putot ka, magpasalamat ka nalang kay malawig man ang imo ginhawa. | Judy Ann Juare