Nakita na ang lalaki nga senior citizen nga nauna ginreport nga missing sang iya mga himata sa Barangay Maninang, Sapian, Capiz.
Matandaan nga ulihi nakita ang tigulang sang Mayo 28, nga ginkilala kay Jose Flores Obamos, 78-anyos kag residente sa Sitio Proper sa nasambit nga banwa.
Sandig sa impormasyon nagikan sa Sapian Municipal Police Station, nakita ang tigulang takna alas-9 sang aga sang mag-abyan nga sanday John Rey kag Junnel sa bahin sang katalunan kapin isa ka kilometro ang kalayuon sa balay ni Obamos.
Ginapahayag nga nagtalang ang tigulang kag wala na makatultol base man sa panaysayon sini sa duha ka nakakita.
Gilayon nga nagpangayo sang tabang ang mga ini kag ginpadangat sa ospital si Tatay Obamos para dapatan sang nagakaigo nga pagbulong. | KMD Gicalde