KABANKALAN CITY, Negros Occidental, Philippines — Gina-tudlo nga imbolbado sa pag-patay sang isa ka mangunguma sang 2023, ang lamharon nga napatay sa nagluntad nga gina-alegar engkwentro sa tunga sang New People’s Army (NPA) kag pwersa sang gobyerno sa banwa sang Moises Padilla (Magallon) sang Abril 4, 2024.
Ang lamharon nga napatay ang gin-kilala Kay Marlon Catasio, 24-anyos nga taga Sitio Tios, Barangay Quintin Remo, sa nasambit man nga banwa.
Sa pag panalaw-saw sang Brigada News FM-Kabankalan, nahibalu-an nga isa si Catasio sa lima ka mga tawo nga gina-alegar miyembro sang sparu unit sang New People’s Army (NPA) nga gina-tudlo nga imbolbado sa pag-patay kay Joemarie Benitez, 28-anyos kag residente sang Purok Inarawis sa amo man nga barangay kag banwa, sang Agosto 5, 2023.
Suno sa mga otoridad, gina-akusahan sang grupo si Benitez nga isa ka “military informant,” kag amo ini ang gina-lantaw nga rason kun nga gin-tiro sang amo nga grupo ang ulo sang biktima sang duwa ka beses.
Pahayag sang iloy sang biktima, upod ang mga suspetsado kag ang biktima sang pag-panyapon sa balay sang pamilya Benitez, matapos mag-kaon, gina-alegar nga gin-agda sang grupo ang iya bata nga mag-guwa sa ila balay, kag didto niya na nabati-an ang mabaskog nga lupok sang armas.
Nakita nalang sang iloy ang iya bata nga naga-hamyangon sa duta matapos ang pag-patay.
Gina-tudlo man sa krimen sanday Reynaldo Catasio, Jesus Molena, Rolando Juanites kag Carmilito Juanites.