Nakumpiska sa Naval Forces Eastern Mindanao (NFEM) ug Bureau of Customs (BoC) 11 ang P13.8 million kantidad sa ismagul nga mga sigarilyo sa Barangay Camudmud, Island Garden City of Samal, Davao del Norte niadtong Dominggo, Hulyo 9.
Malampuson nga nababagan ang maong mga kontrabando atol sa gilusad nga joint law enforcement operation sa Naval Task Force 71 pinaagi sa BA492 sa 4th Boat Attack Division ug Naval Special Operations Unit 7 kauban ang BoC batok smuggling activities nga miresulta sa pagkasikop sa jungkung vessel FB Alyasra-2 diin puno kini sa mga smuggled cigarettes.
Nakuha gikan sa sakyanang pandagat ang 468 ka mga kahon sa Canon brand smuggled cigarettes nga mukantidad sa P13,806,000 nga gikan pa sa Sulu.
Gikustodiya na ang maong vessel sa Naval Station Felix Apolinario, Panacan, samtang ang napulo ka mga crew ang gidala sa Camp Panacan Hospital alang sa medical checkup.
Samtang ang mga kontrabando ang anaa na sa BoC Davao alang sa saktong disposisyon ug alang sa pagpasaka og tukmang kaso.