Gituman sa militar ang pasalig niini sa mga lider ug miyembro sa komunistang grupo nga mapasilitar sa COVID-19 vaccination ugaling makadesisyon sila nga mubalik sa sabakan sa gobyerno.
Pinaagi sa koordinasyon sa nagkadaiyang Local Government Units, ang nagkadaiyang battalion ubos sa 4th Infantry Division Philippine Army, mipasilitar sa pagpabakuna sa mga kanhi rebelde nga maoy pasalig ni Division Commander Major General Romeo Brawner Jr.
Dumduman nga dunay 7 ka rebelde ang nagpositibo sa nahitabo nga engkwentro sa nakalabay nga adlaw ingon man ang consultant sa National Democratic Front nga si alyas Loida.
Muabot sa 39 ka mga kanhi rebelde ug 10 sa dependents niini ang napasilitar sa 88th Infantry Battalion sa Maramag Bukidnon, 58th Infantry Battalion sa Claveria, Misamis Oriental, 75th Infantry Battalion sa San Miguel, Surigao del Sur ug 23rd Infantry Battalion sa Buenavista, Agusan del Norte.
Subli sab nga gipasabot ni Major General Brawner nga seryoso sila sa pagtanyag sa vaccination sa maong grupo, ug gidugang niini nga daghan nga mga kanhi rebelde ang mipadayag sa intensyon nga magpabakuna tungod nagtuo sila sa pelegro nga dala sa COVID-19.