Pormal nga ginlunsar ro Sundown clinic sa probinsya it Aklan.
Raya hay sa pagpamuno ni Governor Jose Enrique ‘Joen’ Miraflores kaibahan ro Aklan Provincial Youth Development Office ag sa pakikipagbueoligan sa American International Health Alliance (AIHA), Aklan Butterfly Brigade, Aklan Provincial Health Office, ag Red Cross Youth Aklan Council.
Igapatigayun ro libreng test sa Provincial Youth Development Office kada Lunes hasta Biyernes, alas-5 it hapon hasta alas-7 it gabii.
Ro nasambit nga clinic hay bukas para sa tanan, mapa-walk-in man o bukon.
Magahueat eamang ro kada indibidwal it 15 minutos para mabuoe ro resulta.
Tinutuyo it inisyatibo nga mapaeapit sa mga Aklanon ro pagpatigayun it HIV Screening ag mabawasan ro kahadlok it kada kliyente nga sanda hay mahusgahan it sosyodad.
Ro sundown clinic hay sangka pasilidad nga nagatao it serbisyo kaangot sa sekswal nga aspeto it eawas parehu it HIV testing, STI testing, ag iba pa.
Ro pangaean nga “sundown” hay natukod bangud maabu sa makarondaya nga clinic hay nagabukas it gabii. // ANN DESLENE SALAZAR