ADUNAY ni-uyon aduna usab dili uyon sa sugyot nga ipatuman ang ‘No Vaccination, No Entry’ policy sa Central Public Market sa General Santos City gumikan sa padayon nga pandemya.
Una na nga gikumperma ni Kapitan Eliseo Garay sa paghinabi sa Brigada reporter nga ilaha nga pagahisgotan sa Barangay South ang mao nga plano aron makatabang sa pagpakgang sa pagkuyanap sa COVID-19.
Sumala ni Kapitan Garay nga ang merkado usa sa dapit kung asa adlaw adlaw nga nagatapok ang mga tawo gikan sa mga vendors hangtud na sa mga mamalitay mao nga daku ang tsansa nga mokatag ang virus samtang nalakip sa ilang plano ang mga establisemento sa Barangay South.
Tungod niini adunay reaksyon ang pipila nga naga-adto sa merkado sama kay Judeth gikan sa Barangay Calumpang, sumala niini nga walay peoblema kaniya kay aduna siyay vaccination card apan ang iyang bana nga wala pa nakapabakuna gumikan adunay balatian maoy problema kon di kasulod.
Ang ilaha daw ginapalit sa sentro nga merkado mga gamit sa balay, sanena ug alang sa ilang kabataan samtang sa mga pagkaun sa Calumpang sattelite market sila nagapalit.
Sumala usab sa usa ka vendor na si Althea Enriquez dili siya uyon sa ‘No Vaccination Card, No Entry’ sa palengke gumikan maka-apekto kini sa ilaha, sa rason nga hinay na ang palit unya istriktuhon pa ang nagasulod.
Ang sugyot ni Althea nga ang istriktuhan ang may aircon nga establishment kay buot ang hangin samtang sa palengke abli kini ug lahos lahos ang hangin, ang maayo daw nga himoun mao lang ang pagpatuman sa health protocol sama sa facemask ug distancing.
Sa bahin usab ni Market supervisor III Lito Esclamado sumala niini nga kon sila lang lisod sila makapatuman sa ‘No Vaccination, No Entry’ policy gumikan sa kadaghan sa entrance ug exit sa merkado dili nila kaya nga bantayan tanan.
Gidugang ni Esclamado nga bisan sa karon nga daghan tawo kanunay ang palengke walay daghang natala nga kaso sa COVID-19 nga nanukad sa merkado. I Ver Diazon