PADAK-AN pa sa administrasyon ni Mayor Lorelie Pacquiao ang pondo alang sa AMPING program sa LGU-GenSan.
Kini segun ni Marites Ramirez Dapidran, executive assistant sa AMPING program ilalom sa Pacquiao administration nga sa kasamtangan anaa sa P100 million kada tuig ang budget sa maong programa ug planong padak-an pa, aron mas daghan ang matabangan.
Dugang ni Dapidran kung unsa ang serbisyo sa AMPING sa karon, paningkamutan matud pa nga padak-an kini ug ihatag ang serbisyong totoo.
Kasamtangan, mas giplastar matud pa ni Mayor Pacquiao ang opisina sa AMPING aron mas accessible sa mga tawo ug mahimong kumportable sila nga moadto.
Sa mga nagkinahanglan og tabang alang sa pambayad sa ospital, tambal, medical supplies, laboratory, diagnostics, dialysis, chemo therapy, mortuary ug bisan sa nanginahanglan og dugo, abli ang opisina sa AMPING, Lunes hangtud Biyernes, alas 8 sa buntag hangtud alas 5 sa hapon.
Sa kasamtangan, gibutyag ni Dapidran nga gina-validate pa sa City Budget ug Accounting Office ang mga natabangan sa miaging administrasyon aron sayron kung may nabilin pa nga pondo.
Sa mag-avail sa AMPING program, kinahanglan lang magdala sa kumpletong requirements aron insigida makuha ang gikinahanglang tabang.