KALIBO, AKLAN—Gintaw-an it pagkilaea it Sangguniang Bayan Kalibo do sangka Kalibonhon Olympian nga si Nelly Restar-Gonzales pinaagi sa ginpasa nga resolution ni Sangguniang Bayan Member Phillip Kimpo sa regular session.
Nakabaehag sa nasambit nga resolution nga si Gonzales hay kaibahan sa Philippine delegation para sa 18th Tokyo Olympics ku October 1964 ag nai-buesa do bronze medal sa Athletics kung siin gintao man kana it Philippine Olympic Committee ku 1988 do “Scroll of Honor,” bangud sa pagtao kara it dungog sa Pilipinas.
Dugang pa kara, sa anang “superb athletic career”, si Gonzales hay ginbansagan nga “Fastest Woman in Asia” para sa hurdles event matapos basagon do bag-ong Asian Games record.
Sa makarun sigon nga una eon raya sa anang advanced years it anang kabuhi hay angay ag bagay eamang nga itao kana do pagpasidungod para sa sangka Kalibonhon hero hasta nga kaya pa kara nga i-enjoy do ginpangabudlayan.
Samtang, pinaagi man sa nasambit nga resolution hay ginhinyo it SB Kalibo sa Philippine Sports Commission (PSC) nga mataw-an it material support do Olympian ag istudyuhan do posibilidad nga mataw-an raya it kadugangan nga pagkilaea. // ANNE REUNIR-VIDAL