HALOS mihunong ang kalibutan sa usa ka ginang human na ospital atong Agosto 08 tungod sa heart enlargement.
Gikan sa lagsik nga solo parent sa upat kaanak nga maoy mitindog isip haligi ug ‘ilaw’ nang tahanan sa pamilya.
Karon nagtuyok na lang ang kinabuhi ni ginang Teresita Esparcia, 52-anyos, taga Purok 6, Luwalhati, Barangay Mabuhay GenSan sa ilang panimalay human na-paralyze ang katunga sa lawas niini ug nakasinati og brain damage.
Ang maong balatian sa ginang ang miresulta sa paglisod niini sa pag-estorya ug paglihok.
Determinado si Teresita nga gilayong maka-rekober gikan sa gihambin nga balatian aron mapadayon ang pag-atiman sa mga anak.
Apan tungod sa kakulangon og kwarta nga i-gasto sa speech, physical ug occupational therapy niini nga bug-at sa bulsa.
Naglisod ang pamilya kung asa mokuha og pambayad sa matag session sa maong mga therapy.
Kini ang rason sa pag-apela ni Aileen Rynn, anak ni Teresita og tabang pinaagi sa programang Kabrigadahan GenSan, Sabado sa buntag.
Gilayong nagpahigayon og ‘fund raising’ alang sa ginang ang programa ug nakatigum og naa sa P4,878.
Ang natigum nga kantidad sa salapi ang gitunol mismo sa Ama ng Brigada, Idol Brigada Elmer V. Catulpos kang Teresita sa ilang panimalay.
Hugot ang pasalamat sa pamilyang Esparcia sa mga miyembro sa Kabrigadahan nga mitabang ug kang Idol Brigada Elmer.
Si Teresita ang usa sa community officer sa Kabrigadahan sa nasangpit nga barangay.