Kapin kon kulang P30,000 ang nakolektang tabang alang sa operasyon sa sakit nga goiter sa usa ka Maria Fe Caballero, 56 anyos nga taga Sto. Tomas Davao del Norte human midangop sa 91.5 Brigada News Fm Davao niadtong Sabado.
Sa makausa pa, wala nagpakabuta-bungol ang mga maloloy-ong Dabawenyo ug sa walay pagduha-duha misalmot sa BRIGADAHAN og mitunol gikan sa gamay ngadto sa dakong kantidad sa salapi nga magamit sa ginang sa iyang operasyon.
Nasayran nga 14 anyos palang kining nag-antos sa iyang goiter ug sumala sa mihiling kaniya nga doctor kinahanglan ang hinanali niining operasyon gumikan sa kadelikado na niini.
Tungod sa kapubrihon gustuhon man apan walay ikasarang ang ilang pamilya maong midayo gayud ang maong ginang gikan sa Davao del Norte padulong sa Davao City sa pamasin nga matabangan sa iyang sitwasyon butang nga wala usab pakyasa sa mga tigpaminaw sa Brigada News FM Davao.
Sa tanang mitabang sa atong BRIGADAHAN! DAGHANG SALAMAT MGA KABRIGADA!
