WALA pay releasing sa sweldo sa mga benepisyaryo sa TUPAD program sa Department of Labor and Employment ning panahon sa eleksyon.
Kini ang gikumpirma ni Labor Employment 3 sa DOLE-GenSan, Diomedes Lumayag Jr. nga bugtong mahitabo mao ang pagpirma sa kontrata sa mga beneficiaries nga gina-profile pinaagi sa tabang sa implementing partners sama sa barangay.
Gipaklaro ni Lumayag sa karon bugtong contract signing lang sa mga benepisyaryo ang mahitabo aron makasugod na sa ilang trabaho apan kung sa pag-release sa sweldo, dili pa karon mahitabo.
Ang TUPAD program ang tabang sa gobyernong national pinaagi sa DOLE aron adunay income ang mga trabahante o bisan gapangita og trabaho pinaagi sa mga community works.
Matud ni Lumayag nga ang DOLE ug ang taga barangay na ang maoy musuta kung tinuod nga mahimong benepisyaryo ang mga anaa sa listahan nga gisumite kanila.
Lakip sa mahimong benepisyaryo ang mga self employed, mga senior citizens hangtud edad 75-anyos nga wala ginadawat nga pension ug kasagaran gikan sa informal sector.