Pipila ka mga vintage bombs ang nakit-an sa usa ka residente sa Km. 6, OLIC Village, Diversion Road, Matina Crossing, Davao City alas 2:30 sa milabay’ng adlaw.
Giila ang maong nakakita sa maong mga bomba nga si Jessa Mae Bantilan, 30 anyos, single, usa ka online VA ug lumolupyo sa maong lugar.
Nasayran nga samtang gapang-limpyo luyo sa ilang panimalay si Jessa, namatikdan niya ang usa ka bangag, diin gituohan nga nabanlas kini tungod sa mga pag-ulan, nga adunay metal o bakal nga naka-ulbo.
Paspas siya nga nagpatabang sa mga sakop sa Talomo Police Station nga gilayon sab nga miresponde uban sa Davao City Explosive and Canine Unit.
Napamatud-an usab nga ang maong mga metal nga nakita mga vintage bomb. Ang maong mga bomba anaa na karon sa kustodiya sa Davao City Explosive Ordnance Disposal and Canine Unit alang sa saktong safekeeping.