Nanatiling walang suplay ng kuryente ang mga lugar na nasasakupan ng Cagayan Electric Cooperative 2 matapos mawalan ng suplay ang NGCP bunsod ng pananalasa ng bagyong Egay.
Batay sa anunsyo ng kooperatiba, walang pasok ang kanilang tanggapan ngayong araw dahil sa lakas ng ulan at hangin na nararanasan sa probinsya.
Sa kabila nito ay mananatili namang bukas ang hotline numbers ng CAGELCO II upang tugunan ang anumang concern ng bawat member-consumer-owners.
Kaugnay dito, kinakailangang i-report agad ng mga MCO sa tanggapan ng kooperatiba ang mga natumbang poste ng kuryente upang agad itong mapuntahan ng kanilang technical team.
Samantala, patuloy naman ang isinasagawang restoration ng CAGELCO 1 sa mga lugar na walang kuryente ngunit hindi muna ibabalik ang suplay sa mga binahang lugar upang maiwasan ang anumang insidente o electrocution.