Napasakaan na sang panumbungon ang duha ka mga suspek sa pagpangholdap sa Barangay Tacas, Pontevedra, Capiz.
Sa impormasyon nga nakuha sang Brigada News FM Roxas City kay Police Staff Sergeant Rhea Batuigas, ginpahayag sini nga kaso nga Robbery kag pagbayolar sa Republic Act 10591 ukon Comprehensive Firearms and Ammunition Regulation Act ang ginpasaka sa mga suspek nga sanday Jet Dela Torre sang Barangay Solo, Pontevedra kag Rene Liboon nga residente sang Barangay Dacuton banwa sang Dumarao.
Matandaan nga gintambangan nanday Dela Torre kag Liboon ang biktima ang biktima nga si Jesus Estollano, 47 anyos, nga nagasakay sa top down nga tricycle kag gintutukan sang armas-luthang kag ginkuha ang bag nga nagaunod sang kwarta.
Bangud sini, madasig nga nakapangayo sang bulig sa kapulisan ang biktima sa diin natigayon nga nadakpan si Dela Torre matapos napilasan sa pagbayluhanay sang lupok sang armas-luthang sang ini ang tuyo nga magpalagyo.
Sa karon, nagapabilin sa gihapon nga at-large ang suspek nga si Liboon matapos nakapalagyo dala ang nakuha nga kwarta sang negosyante nga kapin sa P500,000. Nagpanugyan si Batuigas sang mga pumuluyo sang Pontevedra nga masami maghalong kag indi gilayon magsalig sa mga tawo nga yara sa palibot. | Judy Ann Juare