KINATIBUK-ANG P472,000.00 kantidad sa gituohang shabu nga mutimbang og kapin kon kulang 70 gramos ug gidudahang marijuana ang nakumpiska sa PDEA Regional Office XI kauban sa Tagum City Police Station ug uban pang personahe sa otoridad human sa nahitabong buy-bust operation kagahapon sa Purok Cogon, Pearl Street, Barangay Visayan Village, Tagum City, Davao del Norte kung asa upat ka mga indibidwal ang nasikop.
Gi-ila ang mga suspek nga sila Akmad Amerol Agawi, Alyas “Pablo”, 35-anyos, minyo, usa ka electrician, residente sa Villa Cacacho, Brgy. Mankilam, Tagum City, gikonsiderang high value individual ug Albin Biluan Pumar, Alyas “Dodong”, 43-anyos, minyo, walay trabaho, residente sa Purok Cogon, Barangay Visayan Village, Tagum City, gikonsiderang street level individual kinsa sumala sa kapulisan, mga target sa maong operasyon.
Samtang dakpan sab ang mga kauban niini nga gi-ilang sila Sanjie Edig Osmin, Alyas “Sanjie”, 36-anyos, usa ka small engine mechanic, residente sa Purok Cogon, Barangay Visayan Village ug Yasser Andi Tina, Alyas “Master”, 42-anyos, minyo, usa ka tricycle driver, residente sa Villa Cacacho, Brgy. Mankilam, puros gikonsiderang street level individual.
Atol sa maong operasyon, napalitan sa PDEA agent poseur buyer ang mga suspek og usa ka sachet sa gituohang shabu nga mutimbang og kapin kon kulang 5 ka gramo ug mukantidad og P30,000.
Samtang nasakmit sa otoridad ang lain pang 6 ka pakete sa gituohang shabu nga adunay gibug-aton nga kapin kon kulang 65 gramos, usa ka tanum sa gidudahang marijuana, mga drug paraphernalia ug marked money.
Kasamtangan, gikustodiya na sa Tagum PNP ang mga suspek samtang gihikay na ang kasong paglapas sa Republic Act 9165 kon Comprehensive Dangerous Drugs Act of 2002.