CEBU -Tukuron na ang 457 ka mga balay sa isla sa Bantayan, amihanang bahin sa Sugbo alang sa mga biktima sa bagyong Yolanda niadtong 2013.
Gipahigayon ang groundbreaking ceremony ug blessing sa model house nga ‘Kabyayan ni Man Liling’ nga nahimutang sa Barangay Kangkaibe, lungsod sa Bantayan.
Giingong nalangay ug pila ka tuig ang pagtukod niini tungod sa kakuwang sa budget. Diin ang maong proyekto gigahinan og P208 milyunes.
Usa kini ka housing project sa National Housing Authority (NHA) ug local government unit o LGU-Bantayan alang sa mga konstituwente sa lungsod nga walay kapuy-an tungod sa bagyo.
Kahinumduman nga sa pag-igo sa bagyong Yolanda, nga gi-ilang labing kusog nga bagyo nga niigo sa yuta sa kasaysayan sa kalibotan, kapin sa 6,300 ang nakalas sa Kabisay-an ug kadaghanan gikan sa Leyte.//