MALIPAYON na karon si Nanay Dolores Barcelona, 82-anyos tungod bisan dili na makatindog apan makagawas gawas na kini sa iyang balay tungod sa nadawat nga wheelchair gikan sa KaBrigadahan GenSan.
Asoy niini, magduha ka tuig na nga giantos ang osteoarthritis, ang rason sa paghubag sa iyang mga tiil hangtud bitiis ug kung mulakaw kini mopilo ra og kalit ang iyang tuhod.
Human sa pagpanuktok sa kasing kasing sa isig ka miyembro nga siya tabangan aron makabaton og wheelchair, kini ang gidungog.
Mismo si Brigada Elmer V. Catulpos ang mihatod sa ilang panimalay sa Barangay San Jose sa wheelchair mao nga hugot nagpasalamat.
Giampo usab ni Nanay Dolores ang pagpadayun sa pag-uswag sa KaBrigadahan Gensan nga programa ug nanghinaot nga daghan pa sama niya ang matabangan.
Ang nahisgutang wheelchair ang gikan sa “singko, singko” nga donasyon sa mga miyembro sa KaBrigadahan Gensan nga gibansagan nga bayani ni Catulpos tungod sa ilang walay puas nga pagtabang sa ilang isigkatawo.