Buot karon ipa-otopsiya sa otoridad ang patay’ng lawas sa usa ka pulis nga napalgan sulod sa iyang barracks sa Police Regional Office 10 Headquarters sa Camp Alagar Barangay Lapasan ning syudad sa Cagayan de Oro kagahapong adlawa.
Naila ang biktima nga si Patrolman Andy Requilme, 29-anyos, ulitawo nga taga Barangay Indahag ning syudad ug na-assigned sa 2nd Provincial Mobile Force Company Misamis Oriental Police Provincial Office ug na-detailed sa R-4 sa Police Regional Office-10.
Sa imbestigasyon gibutyag ni Police Station 3 Agora Investigator-on-Case Police Senior Master Sergeant Jhonel Monterola nga ala una kagahapon sa hapon, napalgan na lamang nga naligo sa kaugalingong dugo si Requilme sa iyang higdaanan kilid sa motorpool.
Nakahiagom sa usa ka samad pinusilan sa agtang ang biktima.
Samtang sumala sa report sa Scene of the Crime Operatives Region 10 sa pagpanguna ni Police Lt. Jameson Alvior Jr. narekober sa crime scene ang usa ka unit sa .9mm pistol Konik PNP issued firearms, duha ka magazine ug duha ka fired cartridges sa .9mm.
Una nang naka-report si Police Staff Sergeant Celso Labajan Jr. sa City Mobile Force Company nga sa wala pa nadiskubre ang patay’ng lawas ni Requilme nakadungog kini og duha ka pagbuto sa armas.
Nasayran nga gawas sa request nga ipa-otopsiya ang patay’ng lawas ni Requilme aron mabal-an kung unsa gayud ang hinungdan sa iyang kamatayon, buot sab ipa-ilawom ang mga pulis nga on-duty sa maong area sa Parrafin Examination samtang ang ilang issued firearms ipaubos sa ballistic examination.
Gidala ang patay’ng lawas sa pulis sa Bollozos Funeral Homes sa Barangay Bulua ning syudad. –END