Sangka researcher halin sa Aklan State University-New Washington Campus ro nagpanawagan sa grupong nagapamuno sa Kalibo Bakhawan Eco-Park nga punduhon ro sambilog sa mga proyekto kara.
Ro ginatumod nga proyekto hay ro padayun nga pagtanum it mangroves bangud ginasugid nga nakakabulig raya sa problema sa pagbaha sa lugar.
Base kay Dr. Yasmien Primavera-Tirol, assistant professor sa ASU-New Washington, nakipagpueong imaw ku July 20, sa mga taga Kalibo Save the Mangrove Association (KASAMA), para ipasayud kanda ro mga peligro it padayun nga pagtanum it bakhawan o mangrove sa eco-park sa New Buswang, Kalibo.
Matandaan nga pilang miyembro it KASAMA ro unang nagtanum it mangroves ku 1990 kung siin, natakpan pa kato it eapok ro lugar ag owa it bakawan.
Ro LGU kato hay nakipagbueoligan sa Department of Environment and Natural Resources (DENR) para magpatigayun it maeapnagon nga pagtanum it bakawan sa lugar.
Sa makarun ro Bakhawan eco-park hay may sakop nga 220 hectares it mangrove.
Base segun sa ginapatigayun nga pagtuon it ASU, ginapakita nga bangud sa maeapad eon ro bakawan, sambilog eon raya makarun sa rasun it pagbaha kung nagabuhos ro mabaskug nga uean sa Kalibo
Samtang, base sa KASAMA, igapaabot nana ro paandam ag rekomendasyon ni Tirol sa anang grupo. // ANN DESLENE SALAZAR