CEBU – Niabot sa 28 milyones ka pesos nga kantidad sa illegal nga drugas ang nasakmit sa Police Regional Office(PRO 7), sulod lamang sa upat ka adlaw nga simultaneous anti-criminality and law enforcement operation (Sacleo).
Base sa datos sa Regional Operations Division sa PRO-7, adunay 4.11 ka kilo sa gituohang shabu ang ilang nasakmit diin ang standard drug price anaa sa P27,983,768 gikan sa 171 ka police operations.
Samtang nakasikop usab sila ug 195 ka mga drug personalities sa maong anti-criminality operations.
Sa ilang kampanya batok sa illegal nga sugal, nakasikop ang kapulisan og 292 ka mga sugarol ug pagkasakmit sa P31,200 nga kwarta gikan sa sugal.
Ug sa kampanya batok sa loose firearms naka-imbargo ang kapulisan ug 188 ka dili lisensyado nga armas.
Nakasikop usab sila ug 218 ka wanted persons nga napalutsan ug warrant of arrest, diin 25 niini nabutang sa most wanted.
Gipadayag ni PRO-7 Dir. Police Brigadier General Anthony Aberin padayon nilang gihingusgan ang kampanya batok sa nagkadaiyang krimen ilabina nga nagkaduol na ang Barangay ug Sangguniang Kabataan Election (BSKE) sa Oktubre 30, 2023.//