LEGAZPI CITY – Nangapodan sa publiko an Albay Provincial Veterinary Office na suportaran an produkto kan saindang Albay Dairy Project.
Sa intrevista kan Brigada News FM Legazpi kay Livestock Production Division Chief Dr. Marlon Tapel, sinabi kaini na sa bilog na Pilipinas, dai man uminabot sa 2% an mga nagagamit ki mga natural na gatas.
Alagad 95% su boot na pigkukonsumong gatas sa nasyon, mga imported.
Pig-enganyar man ni Tapel an mga Albayano na magbakal kan gatas na an saindang opisina mismo an may produksyon sa Albay Dairy Box, Cabangan, Camalig, Albay.
Igwa su boot sindang mga variants asin flavors nin gatas, kun sain nagpoon naman sindang maggibo nin mga ice cream.
Segun pa kay Tapel, saro sa mga prayoridad kan saindang opisina an pagpapakusog kan lokal na industriya kan gatas sa probinsya.
Sa ngunyan, pigbubusol man kan gobyerno-probinsyal an pagpapadagos kan Albay Dairy Project ngunyan na taon.