Gisuta pa sa mga otoridad kung unsa ang hinungdan sa paghikog-patay sa usa ka amahan kung asa nasaksihan pa sa anak sulod sa lawak niini sa Purok Sampaguita B, Brgy. Bal-ason, Gingoog City, Misamis Oriental.
Giila sa Gingoog City Police Station ang biktima nga si Castulo Cainoy Awatin, 54-anyos.
Una niini, nakadawat og tawag ang kapolisan mahitungod sa maong hitago ug gilayon kining girespondihan, apan pag-abot sa mga otoridad sa maong dapit anaa na sa salog ang biktima human gikuha sa pamilya gikan sa pagbitay niini.
Base sa report sa kapolisan, gikabutyag nga igo nalang napalgan sa 16-anyos niining anak nga babaye ang iyang amahan nga nagbitay na sulod sa lawak gamit ang pisi nga nylon.
Sa pagkakarun gisuta pa sa mga otoridad kung adunay foulplay ang kamatayon sa biktima kinsa gihaya na sa pamilya ang patayng lawas niini.