LEGAZPI CITY – Tinawan-duon kan gobyerno-probinsyal kan Albay na warang binabang abiso nin pag-eebakwar an APSEMO sa mga residenteng harani sa Bulkang Mayon katakod kan nairehistrong phreatic eruption kan nakalihis na Domingo, Pebrero 4.
Sa intrevista kan Brigada News FM Legazpi kay Provincial Information Officer Lorena Quising, sinabi niya na dawa warang evacuation advisory an APSEMO, kaipuhan man gilayon na sunudon an mga otoridad.
Segun saiya, padagos nindang inaabisuhan an mga C/MDRRMO mag-monitor sa sitwasyon sa palibot kan Mayon, orog na ngunyan na dakol an naglalaog-luwas sa may 6 kilometers permanent danger zone.
Katakod man kaini, padagos man an sinasagibo nindang oryentasyon orog na sa mga bagong opisyales kan barangay nganing ipasabot sa mga ini an dakula nindang responsibilidad sa pagpapautob kan disaster risk reduction management sa probinsya.
Tinawan-duon pa niya, mamamantenir an zero-casualty kun padagos na masunod an publiko sa mga otoridad.