NAGPAABOT og pasalamat ang bag-ong labaw sa PNP Region-12 sa naghatag impormasyon kalabot sa kargamento nga walay igong dokumento nga naharang sa checkpoint sa Barangay Bulatukan, Makilala, North Cotabato, Nobyembre14, 2021.
Sa pahayag sa tigpamaba sa PNP Region 12 nga si PLt. Ma. Joyce Birrey nagapasalamat si Police Brigader General Alexander Tagum sa komunidad nga nagatabang sa pagahatag impormasyon kalabot sa mga illegal nga gimbuhaton sama sa pagpalusot sa smuggled goods.
Tungod niini mopasaka og kaso ang kapulisan sa ilang mga dinakpan human sa pagharang sa usa ka sakyanan gikan sa Davao City padulong sa Cotabato nga adunay karga nga 250 ka boxes sa imported nga sigarilyo.
Ang cartoon sa sigarilyo kolor puti adunay marka nga ‘Tradition Made In Germany’ mao nga makig-alayon sila sa Bureau of Customs aron masayran kon asa gipaagi ang mao nga kargamento nganong nakaabot sa Pilipinas.
Gidugang ni Birrey nga ang kaso nga ipasaka batok sa mga dinakpan mao ang Violation of Section 1113 Paragraph F in relation to Section 1401 sa RA 10863,Customs Modernization and Tarriff Act, ikaduha ang RA 10591 human nga adunay nakuha nga armas nga Colt 45, may lima ka bala ug usa ka magazine.
Ang mga sakay sa Forward 6 wheeler truck nga gidala sa Region-12 silang Rheno Quiao Mariscal, 24-anyos nga taga Purok Kaunlaran, Matan-ao, Davao Del Sur, Romulo Calibo Soria, 43-anyos taga Tres De Mayo, Digos City, Rey Arnold Mariscal, 55-anyos taga Matan-ao, driver sa truck, Pablito Agravante Elorcha taga Matan-ao, 48-anyos, labor ug si Glenn Judilla, 33- anyos, laborer.
Ang truck naharang sa kaadlawon sa Nobyembre 14 adlaw nga Dominggo gumikan sa sumbong sa impormasyon nga nadawat sa kapulisan, ang unang report gikan Indonesia ang mga sigarilyo apan sa paghabwa nakita nga gikan Germany ang mga sigarilyo. Gihimo ang pagdiskarga ug imbentaryo sa mga 250 boxes sa sigarilyo ug sa nakuhang armas sa covered court sa PNP Region 12 sinaksihan sa mga sakop sa media. ( Ver Diazon)