KABANKALAN CITY, Negros Occidental, Philippines — Nag-deklarar na ang banwa sang San Enrique sang state of calamity, sang Lunes, Abril 8, bangud sang halit tuga sang El Nino phenomenon.
Suno kay mayor Jilson Tubillar, dako na nga kapyerdihan nga gin-dala sang drought, sa diin nag lab-ot sa 9 million pesos ang kahalitan nga gin-dala sa sa siyam ka barangay sang banwa, ilabi na sa mga pananum nga humay, tubo kag mga punong.
Matapos ang deklarasyon, magamit na sang banwa ang ila calamity funds, sa diin paga-gamiton ini para maka-hatag sang bulig pinansyal sa mga mangunguma nga na apektuhan.
Sa karun, gina-desisyonan pa sang sang banwa kun pila ang balor sang financial assistance nga pwede mahatag sang lokal nga panguluhan.
Madumduman nga ang gobyerno probinsyal sang Negros Occidental ang maga hatag man sang bulig sa mga mangunguma sa probinsya.
Dugang pa ni Tubillara nga may gina-patigayon man ini sang “water rationing,” ukon ang paghatag sang ma tubig sa mga lugar kun sa diin naga hubas na ang mga bubun.
Gin-pabutyag man sang alkalde nga gakabudlayan na mga mangunguma sa ila mga pananum bangod sang paghubas man sang mga irigasyon sang banwa.
Gin-aprobahan ang amo nga deklarasyon sang Sangguniang Bayan members base naman sa rekomendasyon kag assessment sang Municipal Disaster Risk Reduction Council (MDRRMC), matapos ang ila special session sang tinalikdan nga adlaw.*