Nagpatigayon sang Barangay Drug Summit ang mga kapulisan kag Philippine Drug Enforcement Agency nga gintambungan naman sang mga Barangay Kapitan ukon Opisyales sa Roxas City.
Sa interview sang Brigada News FM Roxas City kay Kapitan Aileen Leones, sang Barangay V, iya ginpahayag nga nagtambong siya sa summit nga ginhiwat sa barangay hall sa Barangay I.
Suno diri, sa ila ginpatigayon nga open forum nahinalaan nga ang tanan nga mga drug surenderee sa barangay kinahanglan nga magpakigbahin sa Community Based Rehabilitation Program (CBRP) agud amat-amat na nga malimpyuhan ang ila pangalan kag dulaon na sila sa listahan nga nagagamit ukon imbolbado sa iligal nga druga.
Sa tion nga magpamalibad ang mga ini nga indi magtambong sa CBRP magapatigayon ang mga kapulisan kag PDEA sang house visitation.
Katuyuan sang nasambit nga summit nga pabakuron ang Barangay Anti-Drug Abuse Council agud mangin Drug-free na ang 47 ka barangay sa syudad.
Nagtambong sa sini nga pagtililipon si Dr. Faye Besana bilang tiglawas ni Mayor Ronnie Dadivas, Deputy Provincial Director for Operation PLTCOL Necerato Sabando nga nagrepresentar kay Provincial Director PCOL Jerome D. Afuyog Jr., Roxas City Police Chief PLTCOL Francisco Paguia kag Johny Ibañez sang PDEA. | Judy Ann Juare