DUHA ka doctor ang mipasalig nga tabangan ang featured case sa KaBrigadahan GenSan niadtong Sabado.
Sa panawagan ni Brigada Elmer V.Catulpos kauban silang Thirdy Santander ug Becky Magante isip iyang co-host niadtong higayuna, gilayun nga gitubag ni Dr.Edwin Valencia ug gisegundahan ni Dr. Benjamin Pagarigan.
Si Dina Masauding, 31-anyos ug residente sa purok Malinawon, Brgy.Conel nanawagan og tabang alang sa anak nga 8-months old nga si
Gian Marco nga may bukol sa liog.
Sukad gihimugso may bukol na ang bata ug kini gadako dungan sa pagdako usab niini ug sa giduolan nga doctor, nagkanayun nga kinahanglang operahan ang bukol ug kinahanglan nila og dakong salapi.
Sa pagpaminaw ni Dr. Valencia sa programa ni Brigada Elmer, gilayung mipasalig nga mangita siya og pamaagi ug ginapaadto si Masauding sa opisina niini aron sila ang magka-istorya.
Hugot usab gipasalamatan sa Ama ng Brigada ang committement ni Dr.Valencia ug ni Dr.Pagarigan.
Suportado usab nilang Santander ug Magante ang desisyon sa ginikanan nga ma-operahan ug mapasalamaton sa mitabang, tungod sa inisyal nga panawagan sa ere, ubay ubay ang mihatag og pinansyal nga tabang.