LEGAZPI CITY – Nagdistribwer an Camalig Municipal Disaster Risk Reduction and Management Office (MDRRMO) sa mga estudyante nin family guidebook dapit sa Disaster Preparedness.
Ini an pig-aapod na Information, Education and Communication (IEC) materials, kun sain uminabot sa 2,000 an mga naipanao sa baralikan klase sa Camalig National High School.
Ini may titulong “Gabay at Mapa Para sa Listong Pamilyang Pilipino” na may obhetong matawan sinda nin mas hararom na kaaraman dapit sa mga kaipuhan gibuhon antes, mantang asin makalihis an sarong kalamidad.
Kasabay pa digdi an dapat na pagkakaugwa kan kada pamilya nin emergency “balde” or na emergency tool kit na may laog na mga pagkaon, hygiene kits asin iba pang mga basic necessities.
An lakdang na ini parte kan pagsyertong mas mapakusog an kahandaan kan mga pamilya sa anuman na huma nin kalamidad.