MOKABAT na sa 15 ka mga peke nga delivery van stickers ang nakolekta sa City Treasurer’s Office human nga may taga Davao nga nakabayad og peke nga sticker.
Sa paghinabi sa Brigada Gensan kay Zenaida Eturma gipakita niini ang peke nga mga sticker sa delivery vans ug trucks, aduna pay petsa nga 2022 ug may pirma sa kanhi Mayor nga si Ronnel Rivera unya aduna usab 2023 nga sticker nga adunay perma sa kasamtangan nga Mayor nga si Lorelie Pacquiao.
Gipaklaro ni Eturma nga ang mga control numbers sa mao nga mga sticker na isyu na sa ubang negosyante, mao nga ilang nasuta nga adunay naga imprinta sa orihinal nga stickers unya ginagamit sa pangwarta.
Gumikan niini ilang gimbestigahan kung si kinsa ang nagahimo niini sa mga enforcers gumikan ang report sa negosyante nga taga Davao nasita ang iyang driver sa Diversion Road kay walay sticker unya gihatagan og sticker apan gipabayad og P1,900 inay nga P750.
Gumikan niini padayon ang panawagan sa City Treasurer ngadto sa mga negosyante nga sa City hall na mokuha og delivery sticker. I Ver Diazon