May yara na sang ginalantaw nga suspek ang pamunuan sang Capiz Rehabilitation Center (CRC) nga nagagamit sang iligal nga droga sa sulod sang selda 3 sa nasambit nga pasilidad.
Ini ang ginkumpirma ni Provincial Jail Warden Arjuna Yngcong, sang ma-interview sang Brigada News FM Roxas City.
Suno kay Yngcong, may yara na sila sang listahan apang indi pa nila pwedi mapaguwa bangud ipaidalom pa sa drug test ang mga ginasuspetsahan nga mga Person Deprived of Liberty (PDLs) kag sa tion nga magpositibo ang mga ini pagapasakaan ini sang panumbungon kag bawalan ang pabisita sang ila mga dalaw ukon himata.
Dugang pa sini, sa kadamuon nga pagpatigayon sang oplan galugad sa nasambit nga pasilidad, ini lang ang labing una nga kahigayunan nga nakakuha sang iligal nga droga sa sulod sang selda.
Nahibaluan nga nagmando si Yngcong sang oplan galugad kahapon nga adlaw sang Huwebes, Setyembre 21 matapos nakabaton sang impormasyon nga may yara sang mga PDL nga nagagamit sang iligal nga droga sa sulod sang CR kun sa diin positibo nga narekober ang tatlo tanan ka sachets sang ginasuspetsahan shabu kag pila ka mga drug paraphernalia.
Wala man sini ginadula ang posibilidad nga nalusotan sang mga dalaw ang iya mga personnel.
Ginpahayag ni Yngcong nga magahinyo ini sa provincial government sang dugang nga pwersa nga makabulig sa ila hugot nga pagbantay sa CRC.
Sa karon, padayon sa gihapon ang imbestigasyon sang mga awtoridad sa nasambit nga insidente. | Judy Ann Juare