Gisiguro ni City Transport and Traffic Management Office (CTTMO) head Ret. PCol. Dionisio Abude nga ang tanang traffic lights ang andam alang sa ipatuman nga High Priority Bus System (HPBS) dinhi sa syudad sa Davao.
Gibutyag ni Col. Abude nga gimandoan na ang ilang buhatan sa pag-ila sa mga lokasyon sa mga bus stop ug pagmonitor sa operasyon sa mga bus.
Kahinumdoman nga sa milabay’ng bulan sa Pebrero tuig kasamtangan, giaprubahan sa National Economic Development Authority Board ang bus modernization project ilalom sa Marcos Jr. administration diin anaa sa kinatibuk-ang P73.4 billion ang kantidad sa maong proyekto nga gi-loan sa Asian Development Bank (ADB), ingon man gikan sa nasyunal og lokal nga budget.
Lauman nga magsugod ang maong proyekto sa ikatulong quarter karong tuiga.
Una na nga gikanayon ni Col. Abude nga prayoridad ang jeepney drivers nga makapasar sa training sa Technical Education and Skills Development Authority (TESDA) paunsa pagmaneho sa bus samtang ang wala makapasar ang i-hire gihapon isip staff sa mga terminals o bus depots.