Kulong eon sa New Washington MPS ro sangka driver it tricycle matapos nga matumod nga imbolbado sa daywa ka insidente it hit and run.
Sa report, nagreklamo sa Kalibo MPS si Jervee Mendoza 28yo it Brgy. Estancia, Kalibo nga ku April 10 samtang naga manehu imaw it anang motorsiklo sa may Jaime Cardinal Sin Avenue ag magaliko eon kunta sa Martelino road kat gulpi imaw nga mabangga it sangka tricycle nga madasig ro pagpadaeagan.
Nakaangkon it damage ro anang motorsiklo ag maswerteng owa naninahan ro complainant.
Samtang ro nasambit nga tricycle hay basta eon lang maghalin paagto sa direksyon it Brgy. Andagao Kalibo.
Sa ginpatigayun nga follow up operation it mga otoridad, insigida nga natumod ro tricycle ag ginkilaea ro driver kara nga si Mark Tenazas 35yo nga presenting nagaistar sa Goding Ramos St., Kalibo ag nasayuran nga owa it driver’s license.
Ginkustodiya it Kalibo MPS ro tricycle it suspek.
Samtang, nag agto man ro personnel it New Washington MPS sa Kalibo MPS bangud may natabo man segun nga insidente it hit and run igto ag sa pag verify hay ro nasambit nga suspek man ro gintumod nanda nga imbolbado. // ANN DESLENE SALAZAR