LEGAZPI CITY – Tinawan-duon kan Committee on Laws, Rules and Oversight kan Sangguniang Panlalawigan kan Albay ay dapit sa pending na ordinansang may kinaraman sa dugang na loan na nagkakantidad PHP512M para sa kulang na pondo nganing magin fully operational an Josefina Belmonte Duran Albay Provincial Hospital (JBDAPH) sa syudad kan Ligao bilang provincial hospital.
Sa intrevista kan Brigada News FM Legazpi kay BM Atty. Melissa Abadeza, chairman kan nasambitan na komitiba, pigsabi niya na pigkokonsiderar naman ining provincial hospital alagad haros nasa level 1 pa sana ini o infirmary.
Kagustuhan su boot kan gobyerno-probinsyal na umabot na ini sa level 2 huli ta dakol an limitasyon kan pagiging infirmary.
Segun kay Abadeza, magigin dakula na tabang an JBDAPH en kaso maglevel-up na ini para sa probinsya.
Dugang pa niya, dai man liliwaton an lokasyon kaini dawa igwa nang mga bagong buildings o mga rehabilitasyon kan mga dating buildings.
Pigsabi ni Abadeza, an nasambitan na PHP512M loan, gikan sa Development Bank of the Philippines (DBP), kun sain pinili ini ni Governor Grex Lagman huli ta yaon duman su boot an saro sa existing loan na pigsecure para sa JBDAPH. Pigpadagos lang su boot huli ta kulang su budget kan naenot na pigloan, segun kay Abadeza.