“Thank you so much kay gitagaan ko nimog pag-asa,” pasalamat ni Jonathan Tamayo sa tanang miyembro sa KaBrigadahan Gensan nga nihatag og tabang arun makapanag-iya og wheelchair.
Si Tamayo, 50-anyos nga nag-antus sa chronic kidney disease ug gout arthritis ug naglisod na sa paglakaw hinungdan nga halos naa lang kini sulod sa iyang balay.
Usahay, magsiyagit matud pa siya sa kasakit aron lang makatindog ug makalakaw gamit ang sungkod.
Dihang gihatdan og wheelchair mismo ni Idol Brigada Elmer V. Catulpos sa ilang panimalay sa Barangay Apopong didto nabungat ni Tamayo nga may rason na nga siya ang magpahiyom ug hugot nagpasalamat.
Nakahilak usab sa kalipay ang inahan ni Tamayo tungod sa maong wheelchair nga gikan sa pag-amot amot sa mga miyembro sa KaBrigadahan. Nasayran nga kanunayng ginabansagan nga bayani ni Idol Brigada Elmer ang mga miyembro sa KaBrigadahan Gensan tungod sa ilang walay puas nga pagtabang sa isigkatawo.