Gindagsa sang mga magakandidato sa Barangay and Sangguniang Kabataan Elections ang Comelec office sa tagsa ka munisipalidad sa probinsya sang Capiz sa una nga adlaw sang filing of Certificate of Candidacy (COC).
Ini ang ginkumpirma ni Atty. Will Arceño, Provincial Elections Supervisor sang ma-interview sang Brigada News FM Roxas City.
Suno kay Arceño, base sa iya nga monitoring matawhay ang filing of COC kag sa subong wala pa sang nabalhag nga barangay nga makabig nga hot spot area.
Dugang pa sini nga nagapakig-angut man sila sa mga otoridad bangud ang mga kapulisan gid lamang ang makadeterminar kun ano nga mga lugar ang may yara sang area of concerns.
Ginpahayag man sini nga hugot gid nila nga ginabawalan ang mga nagakandidato nga magsuksok sang bayo nga may pangalan nga vote kag kun ano man nga t-shirt nga nagapakita nga siya ang nagakandidato kag ang pagbutang sang mga tarpaulin sa mga public area bangud indi pa ang tion sa pagpangampanya.
Nalipay man si Arceño nga wala pa sang may nabalhag nga nadakpan nga naglapas sa gun ban diri sa probinsya sang Capiz. Sa karon, nagapadayon sa gihapon ang mga random checkpoint sang kapulisan sa palibot sang syudad kag sa bug-os nga probinsya. | Judy Ann Juare