LEGAZPI CITY – Isinagibo kasobagong aga an sarong funbike na aktibidad para sa Road to K bilang suporta sa Police Regional Office (PRO) 5 Kasimbayanan sa Obelisk, Brgy. Puro, sa siyudad kan Legazpi sa probinsiya kan Albay.
Sa intrevista kan Brigada News FM Legazpi ki PLt. Karen Formales, sinabi niyang pigrerepresentar kan programa an tuga asin kampanya kan mga kababaihan asin kalalakihan kan PRO5 na mapasakamot an katoninongan, seguridad asin progreso sa paagi kan nasambitan na cycling activity.
Segun kay Formales, an aktibidad bako sana sa probinsiya kan Albay, kundi sa bilog na rehiyon, kaibahan an mga katuwang na mga ahensiya, organisasyon asin an mga komunidad.
Apwera ka ini, igwa su boot ki mga representahe an kada police station, asin nag-imbitar man ki nagkapirang cyclist enthusiasts ngareg makisumaro sa aktibidad.
Pinonan an fun bike kasobagong alas-5:30 nin pagkaaga sa nasambitan na lugar.
Pangapodan asin nilalaoman ni Formales na magkasurundo an kapulisan, simbahan asin an komunidad ngareg magkaigwa ki progresibong siyudad.