EMOSYUNAL ang subling panagtagbo sa amahan ug inahan ngadto sa ilang tulo ka bulan nga baby nga gidagit sa suspek nga babaye samtang nagpa check-up sa Southern Philippines Medical Center.
Una niini, niadtong Oktubre 12 sa hapon gilingla sa suspek ang inahan sa bata pinaagi sa pagpangayo kuno og gatas sa inahan.
Samtang nagkapuliki ang inahan sa pagpump og gatas, gikugos sa suspek ang bata ug kalit na lamang nga miikyas bitbit ang baby.
Human gi-upload sa Bajada Police Station ang footage sa ilang Facebook page, ang mga concerned citizen midangop sa mga awtoridad ug mihatag og impormasyon sa nahimutangan sa suspek.
Kahinumdoman nga malampusong nasikop sa otoridad kagahapong adlawa, Oktubre 13, 2023 ang suspek nga nailang si RHIALYN CAYATANO HERRERA, 36, lumad nga taga-Castillejos Zambales City, ug residente sa Tugbok Mintal, ning syudad.
Na-rescue ang maong bata nga nailang si Baby Asher gikan mismo sa posisyon sa nasangpit nga suspek.
Sumala pa sa suspek nga wala niya tuyoa ang pagdagit sa bata ang iyaha lamang nga magbaton og buo nga pamilya.
Dugang sa suspek nga iyang gikuha ang bata aron nga maoy ipakita sa iyang bana isip puli sa ilang nawala sab sumala pa nga magduha ka bulan nga baby.
Kasamtangan, anaa na gipriso sa Bajada PNP ang suspek og nag-atubang sa kasong kidnapping, samtang ang live-in partner niini nga si Winson Iyo, 35, nanghimakak sa kalambigitan sa insidente.
Samtang, dako sab ang pasalamat sa inahan sa bata nga si alyas Meagan gumikan wala sila pasagdi og gihimo sa kapulisan ang tanan aron nga ma-rescue ang iyang anak nga karon anaa na sa stable ang kahimtang.