MISURENDER sa kapulisan sa Sarangani Province ang usa ka gikaengong miyembro sa New People’s Army (NPA) bitbit ang armas.
Sa taho sa Sarangani Police Provincial Office (SPPO) Martes dihang mitahan sa kaugalingon si Junso Mantang alyas Kobot ug Junso.
Si Mantang ang gikaengong sakop sa Guerilla Front Musa 73 ilawom sa Far South Mindanao Region (FSMR), 28-anyos, ulitawo ug taga Barangay Tambilil, Kiamba.
Matud ni PCapt. Robert Pores, tigpamaba sa SPPO bitbit ni Mantang sa pagtahan ang M2 carbine, .30 caliber rifle dunay 26 ka bala ug duha magazines.
Usa sa rason sumala pa sa pagtahan sa nasangpit ang kakapoy na sa patago-tago sa kabukiran ug buot na niining manginabuhi og hapsay. Kasamtangan, gihikutar na karon sa otoridad ang dokumento aron makaapil si Mantang benepisyo ilawom sa Enhanced Comprehensive Local Integration Program (ECLIP). ( Richel Gubalani)